Joan den urteko apirilean Emmanuel Macron presidente frantsesak bidaia ofiziala egin zuen AEBetara eta, bi herrialdeen adiskidetasuna irudikatzearren, haritz gaztea oparitu zion Donald Trumpi. «Duela 100 urte soldadu estatubatuarrek Frantzian borrokatu zuten, Belleaun, gure askatasunaren defentsan. Haritz hau batzen gaituzten lokarrien oroigarri izango da». Bi presidenteek eskuz esku landatu zuten arbola Etxe Zuriaren aurrean, aldarte ederrean. Zuhaitza, baina, koarentenan jarri zuten handik gutxira, AEBetara inportatzen den edozein izaki bizidunekin egiten duten gisara, eta “The Guardian” egunkariak atzo jakinarazi zuenez, ez zuten berriz bere lekuan landatu, koarentenan zegoela hil egin baitzen. Akabo «adiskidetasunaren haritza».