Iñigo Peña zumaiarra Minskeko Europar Jokoetako finalera sailkatu zen zuzenean K2-1.000 metroko proban, Paco Cubelos ontzikidearekin batera. Euren ohiko estrategiari eutsita, lehen metroetan indarrak gordetzea erabaki zuten eta azken metroetan aurrera egin zuten nabarmen. Bigarren postuan bukatu zuten txanda, Rioko Olinpiar Jokoetan txapeldun izan zen bikote alemanaren atzetik; nahikoa finalean sartzeko.

Begoña Lazkano ere K4-500 metroko proban finalean izango da. Goizeko sailkapen txandetan ez zuten txartel zuzena eskuratu, baina arratsaldeko finalerdietan bigarren izan ziren Danimarkako ontziaren atzetik, azkenean sailkapena lortuz.