Martxa hitzak bi esanahi borobil ditu Donostian eta biek gaurko jaiarekin dute lotura zuzena. Hiria gauerditik hartuta daukate danbor hotsek, eta sortzen duten jai giroa hirigunean eta auzoetan barreiatzen da. Egunotan eguraldiak agintzen duen hotzari nagusitzen uzten ez dion San Sebastian egunaren hasierako orduek elkartasun kutsua hartu zuten banderaren igoeraren aurreko uneetan. Gauerdiaren ostekoa, aldiz, kaleetan bizitako etengabeko jai giroari buruzko hamaika kronikak kontatuko dute. Soilik esan 19.000 lagun inguru biltzen duten 151 danborrada dabiltzala hirian atzera eta aurrera.

Horren aurretik, atzo eguerdiko ekitaldian udalak hiritar merezimenduaren dominak eman zituen, hainbat donostiarren lana aitortzeko. Aurten bereziki erreparatu diete gizarte mailako aktibismoari, animalien eta landareen babesari, buru gaixotasuna dutenen laguntzari, adin txikiko transexualen eskubideen defentsari eta Txernobyleko haurren urteroko harrerei.

Gaurko arreta guztia Alderdi Ederren dago, 6 eta 12 urte arteko 5.000 haur bilduko baitira, txikien danborradan. Udaletxean, bitartean, Urrezko Danborra jasoko dute Realeko futboleko eta belar hockeyko emakumeen taldeek, joan den denboraldian lotutako tituluak aitortzeko.

Martxa ez da gauerdira arte isilduko. Aurten 150 urte bete dituen Union Artesanaren danborrada 20.30ean aterako da Euskal Herria kalean duen egoitzatik eta 23.30 aldera helduko da Konstituzio Plazara.