Odei Barroso Odei raperoaren lehen diskoa da hamabost abestiz osaturiko “Terapia” lan luzea. Joan den apirilaren 22an Urruñan aurkeztu zuen, eta atzo Iruñeko zaleen aurrean izan zen, Laba aretoan.

Odeik 2zio taldearekin hiru disko kaleratuak ditu aitzinetik, eta taldea desegin ondotik bakarkako bideari ekin zion. Orain proposamen berri bat du besapean, trap eta drill erritmika eta soinu-estetika berriarekin heldu baita. «Beste estetika batzuk dastatu nahi nituen, entseatu, ikusi, idatzi, sortu... Kantu batean diot ‘ez dut eskola zaharra ukatzen, baina probatu nahi dut berria’», aldarrikatu zuen.

Bere abestien hitzetan lantzen dituen gaiei buruz, denetarik badela dio artistak. «Erran didate biziki disko intimoa dela». Izan ere, bakarka aritzean askatasun osoa izan du Odeik, beste inorekin kontrasteak egin behar izan gabe, eta normalki, gaiak etorri bezala, idazteari ekin izan dio, gehiegi pentsatu gabe gai hau edo bestea falta ote zitzaion. «Atera den bezala jin da disko hau».

Abesti guziak euskaraz dira eta horretan ez du zalantza izpirik urruñarrak. «Ez dut horretan pentsatu behar. Nik euskaraz pentsatu, idatzi eta abesten dut; hori da egiten dakidana». Euskara ez da inondik ere muga. «Rapa ingelesez edo frantsesez entzuten dugu eta baitezpada ez ditugu letra guziak ulertzen, baina maite dugu», argudiatu zuen. Egun rapa Euskal Herrian ez dela aski hedatua uste du Odeik, gehiago egiteko beharra mahaigaineratuz. Gainera, rapa euskaraz egiteak balio lezake rap zaleak hizkuntzara hurbilarazteko.

Autoekoizpenerako apustua

Bizpahiru abesti kontsumitzera ohitu garen garaiotan, hamabost abestiko diskoa anakronikoa ez ote den galdetu izan diote Odeiri, baina berak argi du: «Diskoaz gozatu nahi duenak uste dut hamabostak entzun beharko dituela eta denek dutela zentzua lan honetan. Mezu bat da ere, gaurko garaiari errateko disko luzeak egiten direla oraindik eta hauek entzuteko patxada hartu behar dela», defendatu zuen.

“Terapia” autoekoizpena da, Jo Olascuaga bere bidaidearekin batera Alkimia Prod osatu baitute. «Guk sortu ditugu baseak, guk sortu ditugu hitzak, guk egin ditugu grabaketak eta nahasketak... Masterizazioa Arteolaren esku utzi dugu», erran zuen Odeik. Duela bi urte ez zekien gauza anitz egiten, baina egun bere bideoklipak egiterainoko jakintza eskuratu du urruñarrak.

Iazko otsailean, ordurako “Terapia” kantuaren bideoklipa aitzinatu zuelarik, aurkeztu duen lehen diskoaren sortze prozesuaz eta bere bakarkako ibilbideari buruz mintzatzeko, elkarrizketa eskaini zion Odeik Kazeta.eus atariari.

Eszenara igotzeko irrikan

Raperoak bi urte eman ditu lana prestatzen, eta zoragarria eta gisa berean neketsua izan dela aitortu du. Orain eszenan aurkezteko eta zaleak gozarazteko gogoz dago eta bederen maiatzean zehar ez zaizkio horretarako aukerak faltako. Lehen emankizunak Euskal Herrian izanen dira, eta hori da bere lehentasuna, baina kanpora joateko irrika ez du ezkutatu lapurtarrak, horrela beste iturri batzuetatik edateko eta ezagutza handitzeko.

Atzo Iruñeko Laban izan zen eta, behin maiatzean sarturik, hilaren 5ean Arrasateko gaztetxean izanen da, 13an Donapaleuko Adaxkan, 20an Baionako Zizpan, 27an Oñatiko gaztetxean eta 28an Zarauzko Literaturian.

Eszenan Odei ez da bakarrik izanen, berarekin batera Jo DJa eta koruak egiten dituzten Unai eta Aitzol raperoak ere lagun izanen baititu, Urruñan bezala.

Disko osoa plataforma digitaletan da jada eta osorik entzun daiteke.