Euskaraz lasai aritzeko guneak sortzeko deia egin zieten «era guztietako entitateei» Euskaraldiaren antolatzaileek. Udazkenean egingo den hirugarren edizioak ariguneak izango ditu protagonista, belarriprest eta ahobiziekin batera. Azaroaren 18an hasi eta abenduaren 2an amaituko da.

Bigarren edizioan ariguneak sortu eta izena eman zuten entitateek beraien parte hartzea berretsi beharko dute webgunearen bitartez eta lehenengoz izena emango dutenek ere helbide bera erabili ahal izango dute izena eman eta arigune kopurua zehazteko.

Ariguneek «hizkuntza ohituren aldaketan eta euskarazko praktika linguistikoak areagotzean duten garrantzia» nabarmendu zuten Euskaraldiaren antolaketan parte hartzen duten erakundeetako ordezkariek.

«Kalea hartu»

Oraingoan ere proposamen hori egingo zaie parte hartzaileei: euskararen erabilera areagotu eta hizkuntza ohituretan aldaketak egiteko erronka zehatzak jartzea.

Goiatz Urkijok, Euskaraldiko koordinatzaileak, «aurreko edizioan izandako baldintzen ondoren, kalea hartzeko, gizarte aktibazioa areagotzeko eta euskararen erabilera zabaltzeko aukera» dela adierazi zuen.