Gaur egun, auto berria entregatzeko batez besteko epea 2019koa baino sei aldiz handiagoa da. Atzerapena hilabete ingurukoa zen orduan eta sei hilabetekoa orain, Faconauto kontzesionarioen elkarteen patronalaren datuen arabera. Hornidura krisiak, batez ere mikrotxipen faltak, eragina izan du.

2020an covid-19aren pandemia lehertu ondoren nazioarteko horniketa kateak haustearen ondorioz sortutako pieza eskasiak atzeratu egin du auto berrien ekoizpena. Orduan, Mendebaldeak ia gelditu egin zuen jarduera ekonomikoa koronabirusaren hedapena geldiarazteko, eta horrek eskaeraren gainbehera eragin zuen, munduko logistika goitik behera aldaraziz. Ondoren, osagaien eskaria lehertu egin zen, eta, oraingoz, eskaintza -batez ere mikrotxipena- ez da gai izan eskatu adina ekoizteko. Ukrainako gerrak eta energia garestitzeak ere eragina dute autoen ekoizpenean.

Auto elektrifikatuen kasuan, erositako ibilgailua jasotzeko behar den itxaronaldia luzeagoa izan ohi da, batez besteko zazpi hilabete bitarteko atzerapenekin. Errekuntza motorrak dituzten ibilgailuentzat, berriz, bost hilabete behar dira, mikrotxip gutxiago behar baitira ekoizteko.

Europako eta Ameriketako Estatu Batuetako markek gehiago nabaritzen dituzte krisi honen ondorioak, hornitzaile propiorik ez dutelako; Asiakoek, berriz, beren kanalak dituzte, eta ekoizpen arazo gutxiago izaten ari dira. Ibilgailu berriak jasotzeko itxaronaldi luze horiek, aldi berean, bigarren mailako autoen merkatua bultzatzen ari dira. Hala ere, eskaintza urria da merkatu horretan ere, eta horrek prezioen igoera nabarmena dakar.

VW Nafarroak amaitu gabe ditu 10.000 auto

Iruñeko Volkswagen-en lantegiak amaitu gabeko 10.000 kotxe baino gehiago ditu, erdieroaleen horniduran dauden arazoak direla eta, enpresako zuzendaritzak Efe berri agentziari jakinarazi dionez. Nafarroako hiriburuko lantegian bertan, T-Cross, Taigo eta Polo modeloetako 6.000 unitate daude aparkatuta, bai bukatutako autoak gordetzeko erabili ohi den zelai nagusian, bai instalazioko beste leku batzuetan, hala nola Landabengo fabrikaren barneko bideetan. Gainerakoak, enpresak Irañeta udalerrian duen landara eraman dituzte enpresako arduradunek, zeina kamioiak kargatzeko ere erabili ohi den normalean. Era berean, autoak biltegiratzen ari dira Santanderko Portuko instalazioetan, eta horrek arazoa sortu dio zuzendaritzari, Volkswagen Nafarroa enpresak ordaindu beharreko plazak baitira.

Enpresako zuzendaritzak adierazi du «ziurgabetasun eta ezegonkortasun egoera» honen ondorioz ekoizpen egutegia astero zehazten dela, lehen egiten zen bezala, lau astetik behin zehaztu beharrean.