Ostiralean Estatu espainolean «Bai bakarrik da bai» esaten dioten legea indarrean jarriko da. Lege honek onarpena erdigunean kokatzen du eta sexu-erasoaren eta abusuaren arteko bereizketa ezabatzen du; argi adostu gabeko harreman sexual oro sexu erasotzat hartzen du. Estatuko Gobernuak legegintzaldi honetan hartu dituen beste neurri batzuen ildoan, emakumeen eskubideen aldeko beste aurrerapauso bat da, eta azken urte hauetan mugimendu feministak sortutako baldintzen ondorio zuzena da.