Euskal Herriko Pentsiodunen Mugimenduak (MPEH) bere sorreraren bosgarren urteurrena ospatuko du urtarrilaren 16an, «zutik jarraitzeko eta pentsio publiko eta duinen alde borrokatzeko prest». Hala adierazi zuten atzo, astelehenero bezala, plazetan egindako elkarretaratzeetan. Bosgarren urteurrena «harro» ospatuko dutela jakinarazi zuten.

Andrea Uña Mugimenduak Bilbon duen ordezkariak aurreratu zuenez, «hainbat ekimen» egingo dira Hego Euskal Herriko lau hiriburuetan zein 75 udalerritan. Gaineratu zuenez, ekitaldiek «zenbait egun iraungo dute, ekimenen arabera, eta modu deszentralizatuan egingo dira, tokiko batzarrei askatasuna emanda».

Astean behin bost urtez elkarretaratzeak egin direla gogoratu ondoren, eta Madrilen zein Bruselan ere manifestazioak egin direla gogora ekarrita, adierazi zuen «inork» orduan ez zuela sinetsi mugimendu hori osatzen duten adinekoek «ilusioarekin, duintasunarekin eta indarrarekin jarraituko zutela» borroka honetan.

2018az geroztik lortutako lorpen batzuk zerrendatu zituen, hala nola «KPIa bi urtez gainditzea, alarguntza pentsioen ehunekoa hobetzea, jasangarritasun faktorea aplikatzea eragoztea eta 2023rako %8,5 eguneratzea».

Hala ere, konpontzeke dauden gaiak daudela gogorarazi zuen. «Oraindik ez dugu lortu 2021eko eta 2022ko KPIaren igoera aitortzea, dagozkion atzera-aktiboak ordainduta; 1.080 euroko gutxieneko pentsioa, edo gutxienez kopuru horretara asko hurbiltzen den bat», zerrendatu zuen.

Abesti bat eta liburua

Urteurrena ospatzeko antolatu diren ekintzak ostegunean ezagutzera emango dira Bilboko Kafe Antzokian. Besteak beste, propio sortutako abestia kaleratuko da. Iñaki Ortiz de Villalbak konposatua, Xabier Amurizaren letrarekin eta Ines Osinaga eta Amaia Zubiriaren ahotsekin ondu da.

Halaber, iazko udan Euskal Herria zeharkatu zuen “Bizikleta Martxa Pentsionista”-ri buruzko liburua aurkeztuko dute, eta bost urte hauek jasotzen dituen aldizkaria banatuko dute kaleetan.