Lula da Silva Brasilgo presidentea, Alberto Fernandez Argentinako presidentearekin batera, giza eskubideen defendatzaileekin bildu zen atzo Buenos Airesen. Besteak beste, 1980ko Bakearen Nobel saridun Adolfo Perez Esquivelen Bake eta Justizia Zerbitzua mugimendua eta Maiatzeko Plazako Amen eta Amonen ordezkariak bertaratu ziren. Horientzat guztientzat Lulak aitorpen maitekorra izan zuen: «Zuen borrokarekin bidea markatzen diguten emakumeak zarete. Zuek bezalako borrokalariak dira demokrazia sostengatzen dutenak».