Iñaki Armendariz Izagirreri ezarritako kartzelaldiaren azken eguna izan zen atzokoa. Hirugarren graduan sailkatuta zegoen Iruñeko presoa eta, atzo zigorra guztiz amaituta, ez du kartzelara itzuli beharko.

1998ko martxoaren 27an atxilotu eta kartzelatu zuten; 25 urteko espetxealdia betetzear zen. Txetxu Gomez Ezkerro eta Juan Mari Etxebarrirekin batera eraman zuen Guardia Zibilak, Iruñeko Arrotxapea auzoan, ETAko komando bat osatzea leporatuta.

Baldintza oso gogorretan bete du ia zigor osoa: isolamendu egoeran gehiena eta etxetik urrun (Herrera de la Manchan bereziki). Urruntzearen ondorioz, bere aitak hil aurreko azken hamaika urteak Iñaki Armendariz ikusi gabe eman zituen.