Udaleko gehiengoaren eta auzokide ugariren iritziaren gainetik, eta udako oporrek ematen dioten babesarekin, Iruñeko Udalak Gurutze Plaza berritu eta Zangoza kalean parking bat egiteko lanak abiatu ditu. Plaza oasi txiki bat da Bigarren Zabalgunean, baina ematen du hiria gutxiengoan gobernatzen duen UPNri ez zaizkiola inporta gero eta larriagoak diren beroaldiak. Garraio publikoaren erabilera sustatu ordez, 35 zuhaitz ebaki eta diru publiko kopuru handiak parkinga eraikiko duten eraikuntza enpresara bideratzea erabaki du, auzoaren kaltetan.