Popocatepetl sumendiak alerta egoeran dauka Mexikoko biztanleria, isurketen kopuruak gora egin baitu azken egunetan. Ur lurruna eta gasak ez ezik, errauts ugari bota ditu, eta horren kausaz Mexiko hiriko Nazioarteko Aireportuko zenbait hegaldi bertan behera utzi dituzte, herritarrak arriskuan ez jartzearren.

Herrialdeko sumendi aktiboenetako bat da Popocatepetl. 70 urte baino gehiagoz geldirik egon bazen ere, 1994an berriro jarduera erakusten hasi zen. Hala ere, 2000ko abenduan erregistratu zen azken urteetako bere erupziorik handiena.