Astelehenean, Israelgo armadak, Gaza suntsitzen hasi eta sei hilabetera, AEBek betoa kendu eta NBEko Segurtasun Kontseiluak Israeli berehalako su-etena eskatzen zion ebazpen bat onartzea ahalbidetu zuen. Berandu bada ere, azkenean nazioarteko komunitateak erabaki lotesle bat hartu zuen Israel Palestinan egiten ari den genozidioa geldiarazteko. Urrats bat zirudien norabide onean, sarraskia, gosetea eta suntsipena amaitzeko.

Benjamin Netanyahuren Gobernuak ez zion jaramonik egin eskaerari. Bere erreakzioa Tel Aviveko Gobernuak Washingtonera egitekoa zuen bidaia bertan behera uztea izan zen. Harrigarriagoa izan zen Estatu Departamentuko bozeramaileak prentsaurreko batean esatea ez zela ebazpen loteslea, hala denean. Segurtasun Kontseiluaren ebazpenari balioa kenduz, Joe Bidenen Administrazioak, Netanyahuri babesa emateaz gain, Nazio Batuei balioa kendu zien. Adierazpen horiek iradokitzen zuten Etxe Zuriari izugarri gogaikarria egiten zitzaiola Netanyahuren bidaia une honetan, baina ez duela ezertan aldatu Israelgo Gobernua egiten ari den sarraskiari emandako baldintzarik gabeko babesa. Egun batzuk beranduago, “The Washington Post” egunkariko artikulu batek berretsi egin zuen Joe Bidenen Administrazioak Israeli milioika dolar balio duten armak eta ekipamendu militarra «zuhurtziaz» transferitzen jarraitzen duela. Horretarako, aldez aurretik onartutako laguntza-lerroak erabili ditu. Modu horretan, ez du Kongresuaren onarpenik behar, eta, gainera, eztabaida publikoa saihesten du.

Joe Bidenen Administrazioa, joko ziniko eta anker batean, jolasean ari da. Aurpegia salbatu nahi du iritzi publikoaren aurrean, Netanyahuri babesa emateari utzi gabe. Trikimailu hipokrita horiek kostu handia dute Palestinan, eta gero eta kostu handiagoa izango dute AEBetako autoritatean. Mundu guztiak ulertzen du AEBen babesik gabe Palestinako sarraskia amaituta egongo zela. Washingtonek bere erantzukizuna onartu behar du eta Netanyahuren Gobernu genozida armatzeari utzi behar dio. Hori da sarraskia gelditzeko bide baka