Amasa-Villabonan sehaska ederra dauka bertsoak, Subijana etxean dagoen Bertsozale Elkartean. Eraikinak hitz egingo balu, hamaika istorio kontatuko lituzke, asko 1880 eta 1960 bitartean bertan izandako oihal fabrikan gertatuak. Emakume asko aritzen zen lanean, eta bertsoak ere entzuten omen ziren lanaldi horietan. Udalak eta Bertsozale Elkarteak memoria historikoaren inguruko eguna antolatu zuten atzo Subijanan. “Emakumeen haria” izeneko murala inauguratu zuten eta, eraikinak hitz egiten ez duenez, bertan lanean aritutako emakume zenbaiti eman zieten hitza.