Ekainaren 28an Añorgako Cementos Rezolako langileek greba mugabea abiatu zuten, gaur egun Heidelberg Materials izena hartu duen horretan. Enpresak ekainean langileei adierazi zien 56 lanpostu kenduko zituela. Hori jakindakoan ekin zioten greba mugagabeari. Protesten eta adostu gabeko negoziazioen ondoren hartutako azken erabakiaren berri abuztuaren 6an eman zuen enpresak: kaleratzeekin aurrera jarraituko dutela. Enpresako langileek, egoera honen aurrean, greban segitzea erabaki dutela aditzera eman zuen LABek ohar baten bidez atzo goizean.

Langileen batzarra atzo egin zuten eta «aho batez» greban jarraitzea erabaki zuten: «Akordio baterako baldintza hasiera-hasieratik izan da kaleratze traumatikorik ez egotea, baina ez da horrela izan». LAB sindikatuak adierazi zuen ez dela bermatu irteerak borondatezkoak izatea. «Horrez gain, enpresak langile jakin batzuk kaleratu nahi ditu gainerakoak baino baldintza okerragoetan», gehitu zuen sindikatuak, hedabideei bidalitako oharrean.

JARRAIPEN ZABALA

«LABek argi dauka kaleratzeak efektibo egin arte enpresak bere erabakia alda dezakeela eta, zentzu horretan, borrokan jarraituko du lanpostuen eta enpresaren etorkizunaren defentsan», nabarmendu zuen sindikatuak, hurrengo egunetan borrokarako dei eginez.

Hasieratik jarraipen handia izan du Añorgako enpresako grebak. Lehenengo egunean plantillaren %100ak greba egin zuen.

Komitearekin elkartzean, enpresak adierazi zuen «alternatiba laboral» bat proposatuko ziola kaleratutako langile bakoitzari: 15 laguni aurretiko erretiroa eskainiko diote; 30 langileri enpresa barruko birkokatzeak: 15 Arrigorriagan eta 15 Erresuma Batuan, Herbehereetan, Alemanian edo Italian; eta beste 11ri beste mota bateko birkokatzeak eskainiko dizkiote.

Langileek ez zuten akordio hori onartu eta borrokarekin aurrera egitea erabaki zuten. Atzo egindako langileen batzarrean berretsi zuten greba mugagabean segitzea.