Osakidetzak Osasun Karpetaren bertsio berritua kaleratu du. Horren bidez, irudi medikoak deskargatu ahal izango dira, eta urteko azken hiruhilekoan Osasun Karpetatik baja, alta eta berrespen parteak ikusi eta deskargatu ahal izango dira, dokumentazioa biltzeko soilik osasun zentrora joan beharrik gabe.

Ohar baten bidez, Lakuak atzo jakinarazi zuen aldaketa horiek digitalizazio estrategiaren barruan sartzen direla, herritarrei beren osasun datu nagusiak teknologia berrien bidez eskuratzea errazteko. «Tresna digital hau, 2013tik herritarrek euren historia klinikoa klik batez ezagutzeko aukera eman diena, eguneratu egin da plataforma modernoagoa, intuitiboagoa eta funtzionalagoa eskaintzeko», adierazi zuen. Era berean, zehaztu zuen ezarri zenetik Osasun Karpetaren erabilerak gora egin duela eta 2023an 5 milioi sarrera baino gehiago izan dituztela, 400.000 erabiltzailerenak. «Zifra horiek agerian uzten dute zenbateko garrantzia duen eta Osasun Karpeta sendotu egin dela, telefono bidezko kontsulten ondoren gehien erabiltzen den bigarren tresna ez-presentziala baita», nabarmendu zuen.

Ildo horretan, 2024ko lehen seihilekoan erabilera datuak «oso positiboak» izan direla azpimarratu zuen, karpetara 427.437 pertsonak egindako 3.769.506 sarrerarekin. «Horrek adierazten du, 2024a amaitzean litekeena dela 2023an erregistratutako zifrak gainditzea», iragarri zuen.

Osakidetzak azaldu zuenez, «aurrerapen teknologiko azkarrak eta erabiltzaileen behar aldakorrek Osasun Karpeta berri bat sortzea eragin dute, arkitektura informatiko aurreratuarekin». «Eguneratze horrek dauden funtzionaltasunak hobetzeaz gain, sarbide errazagoa eta nabigazio intuitiboa errazten ditu, betiere segurtasun- eta konfidentzialtasun-estandar altuak mantenduz», nabarmendu zuen.

Funtzio berrien barruan, adibidez, kalitate klinikoan eta zuzenean Osasun Karpetatik irudi erradiologikoak -Rx, OTA (TAC), EMN (RNM) eta Medikuntza Nuklearrekoak (Gammidiak, Densitometriak, PET-TAC) eskatu eta deskargatu ahalko dira. Gainera, azken hiruhilekoan, Osasun Karpetatik baja, alta eta berrespen parteak ikusi eta deskargatu ahal izango dira.