Lau hamarkada beteko dira bihar, Salvadorren Pakito Arriaran militante euskalduna hil zutela. Urte hauetan internazionalismoaren ikurtzat hartu den arrasatearra omendu zuten atzo bere jaioterrian, «Mundu berri bat daramagu bihotzean» lelopean. Herrien askapenen aldeko konpromisoak eraman zuen ETAko kidea FMLN iraultzailearen borrokarekin bat egitera. Gerran, 1982an, hanka bat galdu arren, gerrillaren logistikan lanean jarraitu zuen Arriaranek, 1984ko irailaren 30ean, Salvadorko armadak Chalatenango mendietan hil zuen arte.