Argazkilariak ziurrenik ez zuen imajinatuko CSM izeneko ikatz-meategian sartutakoan horrelako irudirik harrapatuko zuenik. Ilunpean, lan astunaren nekeak jota, beti arriskupean -2018an metano leherketa batek 13 langile hil zituen bertan-, irribarre bana argiztaturik bi meatzariren ahotan. Txekiar Errepublikako azken ikatz-meategia da Stonavako hau, 3.500 behargin ditu, OKD enpresak kudeatzen du eta ez zaio askorik geratzen: 2025ean bukatzekoa du jarduna. Etorkizunean, energia berriztagarrietan indarra jartzeko asmoa du enpresak.