Kolonbiak aitortu egin zuen atzo, lehen aldiz, Carlos Pizarro Leongomez presidentegai eta M19 gerrilla taldeko buruzagi ohia 1990eko apirilaren 26an tiroz hil izana. Judizioz kanpoko exekuzioan talde paramilitarrak ez ezik, Estatuko agenteak ere tartean egon zirela onartu zuen. 34 urte behar izan ditu Kolonbiako Gobernuak bere erantzukizuna onartu eta egia, justizia eta erreparaziorako urrats bat egiteko. Espero dezagun gertuagoko beste estatu batzuek 34 urte behar ez izatea euskal herritarren giza eskubideen urraketetan dituzten erantzukizunak beren gain hartzeko.