Sustrai Erakuntza fundazioak eta AHT Gelditu! -k deituta, Abiadura Handiko Trenaren obrak gelditzeko eskatu zuten atzo goizen Iruñean, Foruen monumentuaren ondoan.

Parte hartzaileek “AHT geldi dezagun” leloa zuen pankarta bat eraman zuten, baita “Inposaketa”, “Xahutzea” edo “Elitista” bezalako hitzak eta “Kohesio soziala” edo “Errentagarritasun soziala” bezalako esaldiak zituzten kartelak ere.

Ekitaldian «Abiadura Handiko Trena gelditzearen aldeko herri deia» aurkeztu zuten, eta AHTren obrak gelditzearen alde egiteko hainbat arrazoi aipatu zituzten, hala nola «ekonomikoak, lurralde kohesioa, energia xahutzea, parte hartzea, interes espekulatiboak». Sinatzaileek proiektu honetako obrak erabat gelditzeko eskatu zuten.

ERAGILEEN ESKAKIZUNA

Halaber, ukitutako lurraldeak lehengoratzea, garraio ereduari buruzko eztabaida parte hartzailea irekitzea, salgaien trafikoa murriztea «elikagaien eta energiaren subiranotasunari dagokionez» eta egungo trenbide sarea hobetzea ere eskatu zuten.

Orain arte Nafarroako bostehun erakunde eta pertsona baino gehiagok bat egin dute adierazpen honekin. Hainbat sektore ekonomikotako pertsonak dira, hala nola nekazaritza eta abeltzaintzakoak, industriakoak, osasunekoak, irakaskuntzakoak, gizarte zerbitzuetakoak, fisioterapiakoak edo trenbideetakoak. Abokatuak, hedabideak, gazteak, sindikatuak, ikasle taldeak eta etxebizitzen sindikatuetakoak ere bertan izan ziren. Osasunaren, euskararen, lurraren eta eskubide sozialen plataformekin batera.

Erakunde sozialek, politikoek, feministek edo emakume langileenek ere bat egin zuten adierazpenarekin, baita udal arduradunek eta kultura- zein kirol munduko ordezkariek ere.