Heriotzak ez du zertan iluna izan halabeharrez; Guatemalako Santiago eta Sumpango herrietako maiek ongi dakite hori. Azaroaren 1ean, Santu Guztien Egunarekin, koloretako barrilete erraldoiak ateratzen dituzte kalera, eta zerura haizatu. Handienek hogei metroko altuera irits dezakete eta familiak sei hilabetez aritzen dira banbuz egindako egitura hauek artisau eran sortzen. Tradizioaren arabera, barrileteek izpiritu gaiztoak uxatu eta hildakoen arimak beren familiekin elkartzen dituzte. Orain, Unescoren ondare immaterial izendatu dituzte.