Hondeamakina baten palak jota, 51 urteko langile bat hil zen atzo Gasteizko Salburua auzoan. Alaves-Baskoniaren etorkizuneko akademia izango den egoitzaren eraikuntza lanetan gertatu zen istripua, Alaves-Baskonia taldeak adierazi zuenez. Ikerketaren ardura Osalanek hartu duela gaineratu zuten.

Klubak kanpoko enpresa bat kontratatu zuen, indusketak eta lur mugimenduak egiteko futbol zelaia izango denaren eremuan. Hildako langileak Excavaciones Mendiolarentzat lan egiten zuen.

Jokalarien egoitza berria izango den “Ondare” proiektuaren barruan kokatzen da, Salburuako Euneiz Unibertsitatearekin batera.

CCOOk enpresei eta Administrazioari eskatu zien «beharrezko neurri guztiak» har ditzatela «horrelakorik berriro gerta ez dadin». Eta erantsi zuen: «Gizarte aurreratu batek ezin du onartu, eta ez du onartu behar, egunero lanpostura joateak bizitza jokoan jartzea ekarriko duenik».

Bestalde, Baskonia-Alaves taldeak ohar bat argitaratu zuen lagun, senide eta lankideei doluminak helaraziz.

2024AN 63 LANGILE HIL ZIREN

Urteko lehen istripua izan zen, hain zuzen ere eraikuntza lanetako beharginen urteko lehenengo lan egunean. Iaz, LABen zenbaketaren arabera, 63 lagun hil ziren lanean ari zirela.