Profesionaletatik harago, Euskal Herrian oraindik ere badago mugimendua pilotalekuetan. Herrien dinamizatzaile dira, bizigarri, herritarren elkargune sarritan; herria egiten da pilotalekuen bueltan. Bakion, urtean behin, pala eta herria elkartu egiten dira, kasik 24 ordu irauten duen txapelketan. Ostiral iluntzean hasi eta larunbat eguerdian jokatzen da finala. Txapelketa izanik, txapela jantzita bukatzen dute irabazleek, baina pilotalekuaren bueltako herri dinamikaren indar erakusle ere bada. Gau honetan pilotaren soinuek markatzen dute herriaren taupada bizia.