Euskal Pilota Federazioak atzo aurkeztu zituen Euskal Selekzioak Gernikan ofizialki debuta egiteko erabiliko dituen kamisetak. Bertan, Nazioen Zesta Liga egingo da ekainaren 1etik 6ra. Euskal Selekzioak nazioarteko lehiaketa batean ofizialki parte hartuko duen lehen aldia izango da hori, abenduan Iruñean bildutako Nazioarteko Pilota Federazioaren batzarrak Euskal Federazioa sartzea onartu ondoren, eskaera historiko bati erantzunez. Erabaki horrek ezinegon handia sortu zuen bai Federazio espainolean bai Nafarroako eskuinean.