Jon Maiaren ‘‘Kantu bat gara’’ proiektua Zumaiako Itzurun hondartzan itxi zen, ‘‘Harri eta Herri’’ emanaldi bereziarekin. Sortzaile eta eragile zumaiarrak «gure herriari eta gure identitateari emoziotik eta edertasunetik begira» eraikitako egitasmoa izan da, memoriaren transmisioan eta etorkizuneko «euskal identitate berriaren» eraikuntzan egin nahi izan duen ekarpen pertsonala. Hainbat gonbidatu izan zituen ikuskizunak, guztien artean ohiko kontzertuaren kontzeptua gaindituko zuen emanaldi berezi eta parte hartzailea sortzeko asmoz.