Luis Ortega argentinar zinema zuzendariaren thriller dramatikoa da eta iazko Donostia Zinemaldian Horizontes saria eskuratu zuen. Remo Manfredini (Nahuel Perez Biscayart) jockey ospetsu eta arrakastatsua da baina, duen portaera autosuntsitzailearen eraginez, bere talentua itzaltzen hasiko da, eta arriskuan jarri du Abril (Ursula Corbero) bikotekidearekin duen harremana. Zorrez beteta eta Sirena mafiako buruarekin fabore ilunen sarean harrapatuta, zorretatik libratu dezakeen bere ibilbideko lasterketarik garrantzitsuenaren atarian dago.

NAHUEL PEREZ BISCAYART

Protagonistaren rola jokatzen duen Nahuel Perez Biscayart jatorri euskalduneko aktore argentinar ospetsua da (ama euskal eta italiar jatorrikoa eta amona Biarritzekoa). Bere lehen paper garrantzitsua “La sangre brota” (2008) filmarekin lortu zuen, baina nazioarteko ospea “120 battements par minute’’ (‘‘120 latidos por minuto’’, 2017) ekoizpen frantsesari esker iritsi zen. Lan horri esker aktore berri onenaren Cesar saria irabazi zuen eta geroztik oso aktore ezaguna da Estatu frantsesean. 2024an Estatu frantseseko presidente Emmanuel Macroni zuzendutako gutun bat sinatu zuen, Palestinako Estatua ofizialki aitortzeko eskatzen zuena.