Azken asteotan, Yosemiteko murru enblematikoenetik, Capitanetik, berri azpimarragarriak iritsi zaizkigu. Gainera, ia denak eskalatzaile gazteek sinatutako igoerak izan dira. Will Moss da horietako bat. New Yorkeko eskalatzaileak 20 urte besterik ez ditu, eta joan den hilabetean gai izan zen jarduera historiko bat egiteko.

“Freerider” (7c+, 1000 m) zuen helburu; hots, Capitaneko klasiko bat. Apustu handia egin zuen estiloarekin, eta, hain zuzen ere, eite horrek ekarpenaren bidean jarri du. Kilometro luze bat den marra hori flash eran biribildu du, baina egun bateko jardunean. Iaz Barbara Zangerlek mugarria ezarri zuen “Freerider” flash eran igota. Lau egun behar izan zituen igoera historiko hori egiteko. Bada, Mossek, estilo berean, 24 ordu baino gutxiagoan sinatu du lehen ekinaldian eta erorikorik gabe. Hortaz, historia idatzi berri du gazte horrek.

Bitxia da eskalatzaile estatubatuarra egiten ari den ibilbidea. Nahiz eta Yosemiten pare bat denboraldi egin dituen, big-wall edo hormatzarretan ez du eskarmentu handirik. Oso gaztea da. Halere, sasoi zein teknika ikaragarriak ditu, eta hori batez ere eskalada tradizionalean erakutsi du. 18 urterekin eskaladaren komunitatearen zimenduak astindu zituen; izan ere, Shawangunks alderdian 9a maila duen “Best thing in life are free” bidea kateatu zuen.

Lehiaketetan eta boulderrean gogor estutzen ikusi dugu, baina Capitaneko ekarpen honek berriro lehen lerrora ekarri du. Mossek esan du azken urteotan “Freerider” flash eran egitea helburu izan duela: «Xede hori prestatzen ari nintzela, Zangerlek oraindik ez zuen igoera historikoa erdietsi. Haatik, erronka handi hori ezin nuen burutik kendu. Duela pare bat urte, Zangerl han agertu aurretik, aitarekin ‘Freerider’ eskalatzera abiatu nintzen. Motibazio handia nuen, baina iritsi eta ikusi genuen erabat bustita zegoela. Hurrengo urteko hitzorduari ez nion hutsik egin. Zoritxarrez, klimak ez zidan lagundu. Hirugarren eta azken bisitan, berriz, aukera izan dut lorpen hori gauzatzeko. Une egokiaren zain egon nintzen, eta apustua bikain atera zait. Hirugarren bisitan asmatu dut!».

Eskalatzaile gazteak aipatu duenez, hirugarren eta azken bisitan erdietsi du ekarpen historiko hori. Stuart Grossman sokakide zuela, Moss goizeko bostetan hasi zen “Freerider” eskalatzen. Hogeita bi ordu beranduago, Capitaneko gailurrean zen, ibilbide hori flash eran eskalatu ondoren.

Beste bitxikeria bat. Protagonista honek onartu du marra hori flash eran igotzea xede zuela, baina ez egun bateko eskaladan. Hiru eguneko aurreikuspena egin zuen. Baina Moss bikain baino bikainago prestatuta zegoen Zangerlek eginiko eskaladari kosk egiteko edo, bederen, egun batzuk kentzeko. Aldaketaren giltza Heart Ledge luzean kokatu zuen. Ordura arte, eskalatutako bederatzi luzeetan, erritmo ona eramateaz gain, oso eraginkorra izan zen. Egunean eta flash estiloan saiatzeko asmoa puntu horretan indarrean jarri zuen. Jakina, gaztea pozik zegoen hartutako erabakiarekin; izan ere, aurretik zituen luze guztiak erorikorik gabe eskalatu zituen.

AKATSIK EZ

Izaera horretako proiektu bat aurrera eramateko, eite asko kontuan izan behar dira. Argi dago Mossek teknikoki gaitasuna duela, baina ezin da gutxietsi ibilbide hori ia kilometro luze dela. Hortaz, erresistentziak berebiziko garrantzia du. Horrekin batera, eskalatzaile gazteak onartu du “Freerider” oso egokia dela bere ezaugarrietarako. Boulderrean ondo moldatzen da, eta, adibidez, Boulder Problem luzea egokia iruditu zitzaion garaiera handia duelako. Plaka leunetan ere ez da atzean geratzen, eta eskalatzaile askorentzat beldurgarriak diren offwidhtetan azken urteotan asko aurreratu du. Oro har, Mossek berak aitortu duenez, bere ibilbide laburrean asko hobetu du.

Grosmanekin soka gerrira lotu eta goizeko bostetan “Freerider”-en eskalatzen hasi zen. Kopeta-argiaren laguntzarekin, besteak beste, bidearen luze gogorrenetako bat eskalatu behar izan zuen: Enduro Corner. Tarte horri dagokionez, lerrootako protagonistak esan du neurri batean luzeak duen maila gutxietsi zuela. Gogor borrokatu behar izan zuen baina, era berean, aitortu du une oro oso seguru eskalatu zuela. Beste era batera esanda, erorikorik izateko arriskua ez zuela bizi izan minutu horietan guztietan.

Ibilbidearen “mamu” bat gainetik kendu zuen, baina oraindik beste luze gogor batzuk eskalatu behar zituen. Freeblast, adibidez, ez zitzaion batere samurra egin. Plaka horiek biribildu eta Boulder Problem luzera arte azkar eta oso kontzentratuta joan zen. 7c+ mailako metro horiek ez zioten buruhauste handirik eragin. Ia irudikatu zuen bezala igo zuen. Zailtasun tekniko handienak menderatuta zituen, baina bazuen eskalatzaile askorentzat arazo bihurtzen den 6c mailako Monster izeneko offwidtha. Mossek, bederen, ez zuen inolako eragozpenik izan luze horretan; kontatu duenez, azken bi urteotan offwidthetan asko entrenatu eta hobetu du.

Hogeita bi orduan gogor borrokatu behar izan eta gero, Moss Capitaneko tontorrean zen. Eraginkortasun itzela izan zuen. Horretaz gain, ez zuen akatsik egin, eta horrek erorikorik ez izatera eraman zuen. 20 urteko eskalatzaileak Capitanen beste langa bat ezarri du. Onartu du oso urduri jardun zuela: «Halere, neure buruari jarri nion erronkari heldu nahi nion. Azken bi urteotan jo eta su ibili naiz xede horren atzetik. Nahiz eta arrakastarik ez lortu, eskarmentu hori bizi nahi nuen. Oso epikoa izan da eskalada egun hori; inoiz egin dudan luzeena. Aurreko lanari egundoko garrantzia eman nahi diot. Bi urte oso gogor izan dira. Entrenatzeaz gain, ‘Freerider’-en inguruko informazio zehatz guztia barneratu behar nuen. Luze bakoitzaren xehetasun guztiak ezagutzen nituen. Bai, hori beharrezkoa zen arrakasta lortu nahi banuen. Baina kontuan hartu behar da ere oso gaztea naizela eta izaera horretako proiektuetan ez dudala eskarmenturik. Hein batean, neure buruarekin erabat harritu naiz. Pozarren nago izan dudan eraginkortasunarekin. Sasoiz oso indartsu nago, baina ‘Freerider’ oso luzea da eta flash eran igotzeko ezin duzu akatsik egin».