Antton Valverdek euskal kantagintzaren alde egindako lanaren aitortza gisa jaso zuen atzo Adarra Saria. Herri kanten eta bertso zaharren berreskurapenean eta euskal poeta klasikoen obraren zabalkundean izan duen eragina goratu zuten Donostiako Victoria Eugenia antzokian egindako sari emate ekitaldian, eta baita emakumezkoen poesiaren alde erakutsitako sentiberatasuna ere. Valverderen estilo pertsonal eta zaindua lagun, kontzertua eskaini zuen gero Donostiako antzokian, ohiko kolaboratzaileak alboan zituela.