Nico Williamsen inguruan zurrumurruak eguneroko ogia direnean, Barakaldon jokalariaren aurpegia ezabatu zuten atzo goizean bere anaiarekin eta Iker Muniain kapitain ohiarekin batera agertzen zen horma irudi batean. Carlos Lopez artistak egin zuen murala Kopako finalerako. Nico kendu ez ezik, mezu bat ere utzi zuten: «Joan edo geratu, errespetua galdu duzu». Williams anaietan nagusiak anaia txikia defendatu zuen sare sozialetan, honako hau idatziz X-en: «Mezu anonimo batek duen errespetu faltaren atzean beti dago aurpegia emateko txikiegia den norbait».