Bilboko Aste Nagusirako bi hilabete baino gutxiago geratzen direla, Bilboko Udalak atzo jakinarazi zuen Francis Diez, Doctor Deseo taldeko abeslaria, izango dela aurtengo edizioko pregoilaria. Aurtengo txupinera, berriz, Olatz Agirre izango da, Txori Barrote konpartsako kidea. Doctor Deseoko kantaria Bilboko Uribarri auzoan jaio zen eta «bilbotar peto-petoa» dela dio Bilboko Udalak. Bestetik, Olatz Agirrek hamazazpi urte daramatza Txori Barrote konpartsako kide izaten. Itziar Ituñoren eta Nagore Ugarteren lekukoa hartuko dute Aste Nagusiaren 45. edizioan.