Euskal Herriko Unibertsitateak, Eduardo Chillidak 1982an sortutako zuhaitz formako ikurrari eutsiz, irudi berritua aurkeztu zuen atzo Chillida Lekun. EHU euskarazko siglak bakarrik utzi dituzte eta berdea izango da kolore nagusia. Ekitaldian Joxerramon Bengoetxea errektoreak nabarmendu zuenez, «sinpletasunez eta dotoreziaz», komunitate oso baten atxikimendu sentimendua bermatu nahi da. Ereserki izan nahi duen kanta ere aurkeztu zuten. Musika Luca Fanelli musikari eta matematika irakaslearena da eta letra, Jone Uria bertsolari eta matematikariarena.