Zalduan, Pirinioak duela 2.000 urte zeharkatzen zuen galtzada erromatarrari lotutako materialak eta egiturak argitara ateratzen jarraitzen du Aranzadi Zientzia Elkarteak. Ipar mendebaldeko gelan zentratzen dira orain lanak. Marmol xafla eta erlaitz zati landu ugari aurkitu dituzte bertan, eraikinak izan zuen «monumentaltasuna adieraziko lukeena», eta egitura arkitektonikoen ondoan, objektu ugari ere agertu dira. Deigarriak dira jolas edo aisialdiarekin lotutakoak: dado bat, fitxak, txanponak... Ikastaroa antolatu du Euroeskualdeak hilaren 24rako, eta bisita gidatua 26rako.