Estatu espainoleko “party”-rik handiena da Euskal Encounter, egun hauetan Barakaldoko BECen ospatzen ari dena. Ostegunean hasi zen 33. edizioa eta igandera arte luzatuko da, 5.000 parte hartzaile batuz, zeintzuk 200 jarduera baino gehiagoz gozatu ahalko duten.

4.000 pertsonek euren ordenagailua eraman ahal izan dute, gau eta egun 60 Gbps-eko Internet konexioaz baliatzeko.

Horrez gain, Opengune espazioa ere badago, doakoa, non hitzaldiak, tailerrak eta erakusketak dauden.

Javier Gomez-Arruek, Euskal Encounterreko antolatzaile nagusiak, irekiera ekitaldian azaldu zuenez, topaketa honek aisialdirako baino gehiagorako balio du. «Enpresa proiektu berrien sorrera, ikaskuntza, esperientzien trukea eta parte hartzaileen eta enpresen arteko konexioa bultzatzen ditu», adierazi zuen.

Aurtengo edizioaren ardatz nagusia adimen artifiziala da, «gaurkotasuna duen gaia». Beste gai batzuk ere aztertuko dira, hala nola ikerketarako eta irakaskuntzarako tresna digitalak, ziberrindarkeriak, bideojokoen industria eta zibersegurtasuna.

Era berean, Joseba Mariezkurrena Bizkaiko Foru Aldundiko Ekintzailetza, Talentu eta Enpresa Lehiakortasuneko zuzendariak inaugurazioan nabarmendu zuenez, «gure enpresek digitalizatzeko, berritzeko eta lehiakorragoak izateko behar duten talentua da, hain zuzen ere, gaur hemen, Euskal Encounterren, aurkitzen duguna».

«Gure enpresen %90ek eraldaketa digitalari ekin dio, eta %70ek hazkunde aukera ikusten du», gogorarazi zuen bere hitzaldian.

Bizkaiko Foru Aldundiak prozesu horrekin duen konpromisoa nabarmendu zuen: «17 milioi euro baino gehiago inbertitu ditugu 900 enpresa txiki eta ertain baino gehiagoren digitalizazioa laguntzeko».

«PARTY»-AREN ATALAK

Euskal Encounter 33 osatzen duten atalen artean, sormen digitala, hardwarea, software librea, bideojokoak eta aisialdira bideratutako hainbat jarduera nabarmendu dituzte.

Parte hartzaileek beren talentua probatzeko aukera izango dute arte digitaleko lehiaketetan. Zenbait diziplinatako pieza grafiko eta ikus-entzunezko onenak sarituko dituzte.

Gainera, ekitaldian bideojokoen 50 sariketa baino gehiago eta software libreko erronka espezifikoak izango dira. Programazioan eta informatikan adituek hacking etikoa, kriptografia, logika, puzzleak eta alderantzizko ingeniaritza bezalako probak egingo dituzte egunotan.