FVS (Football Video Support) sistemarekin kontatuko du aurten lehenengoz F Ligak; VARaren bertsio sinplifikatu eta eskuragarriagoa da. IFABek (International Football Association Board) proposatu eta onartutakoa da honako hau, VAR tradizionala ezartzeko baliabiderik ez duten lehiaketetarako alternatiba gisa.

Ofizialki onartu zen IFABek 2023ko martxoan egin zen bileran, eta 2024an zein 2025ean zenbait proba egin dituzte. Larunbat honetan bertan hasiko da F Ligako denboraldi berria, eta abuztuko lehen astean onartu ostean, FVS tresna bera erabiliko dute.

Ezarpen honek entrenatzaileek berrikuspenetan zuzenean esku hartzea barne hartzen du, aukera emanez teknikariei topaketa bakoitzeko bi berrikuspen -bi txartelen bidez- eskatzeko. Hala ere, aukeretako bat galduko lukete erreklamazioa arrakastatsua ez izatekotan. Saskibaloian erabiltzen denaren antzerakoa da, beraz.

VARarekin ez bezala (gizonezkoen Lehen eta Bigarren Mailan zein Europako txapelketa garrantzitsuenetan erabiltzen dena), hemen epailea behartuta egongo da teknikariek eskatuta jokaldia berrikustera, eta ez du iniziatibarik izango bere erabakiz pantailara jotzeko. Epaile nagusiak errepikapenak behatuko ditu zelai ondoan kokatutako monitore batean, eta bideo-ekipoarekin komunikazioa berehalakoa eta zuzena izango da; hala, konexio honetan funtsezko eginkizuna izango du laugarren epaileak.

Maila teknikoan, FVS ez da hain konplexua. Lauzpabost kamera baino ez ditu behar, eta bideo-arbitroaren irudia ezabatzen du. Baliabide gutxiagoko txapelketetarako pentsatutako sistema minimalista honek kostuak murrizten ditu, arbitro nagusiaren azterketarako irudiak doitzen dituen operadore baten laguntza bakarrik eskatzen baitu.

FVSk ondorengo funtsezko lau egoeratan esku hartu dezake: golak, penaltiak, txartel gorri zuzenak eta nortasun okerreko egoerak. Hala ere, baliteke tokian tokiko egokitzapenak egotea, lehiaketaren mailaren arabera.

BILAKAERA IKUSTEKE

Tresna dagoeneko probatu zen Blue Stars/FIFA Youth Cup eta 20 urtez azpiko eta 17 urtez azpiko Emakumezkoen Munduko Txapelketak bezalako lehiaketetan, non onarpen positiboa jaso zuen entrenatzaileen artean. Pierluigi Collina, FIFAko Epaileen Batzordeko presidentea, ados agertu zen emaitzarekin. «Ebaluazioaren hasiera besterik ez da, orain arte ez dugu ezustekorik izan», esan zuen italiarrak.

F Ligako epaileak abuztuan zehar trebatu dira gailu berri honen formakuntzan, Murtziako San Pedro del Pinatar herrian egin zen denboraldiaurreko mintegian, lehiaketan ahalik eta finen ibiltzeko asmoz.

Teoriak dena oso polit margotzen du, baina ikusteko dago nola egokitzen diren teknikari zein jokalariak gailu berri honetara eta ea ez duen benetako ikuskizuna zapuzten.