Duela bi asteko denboralearen ondoren, Donostiako udal brigadak etengabe ari dira lanean hiria aurreko egoerara bueltatzeko. Horren adibide dira Ondarretako lorategietan egiten ari diren konponketa lanak. Ohar batean azaldu dutenez, aurrena, lorategiak garbitu dituzte, zikinkeria, harriak eta batez ere hondarra kenduz, guztira 500 tona legar. 300 tona garbi hondartzara bueltatu dituzte eta 200 zikin zabortegira bidali. Gogoz saiatu dira hondarra belarra hil baino lehen kentzen. Horretarako, bi txandatan aritu dira hemezortzi langile. Erabilitako ekipamendua kamioi batek, bi kamionetak, hondea-makina batek eta bi zamaketarik osatu dute.