Bihar aurkeztuko dute, Zarautzen, aurtengo Lau eta Erdiko txapelketa, batez ere Asegarceko ordezkaritzari dagokionez, hutsuneek baldintzatutako lehia izango dena. Izan ere, egoera normalean kaiolan egon beharko luketen hiru aurrelarik ezin izango baitute 2014ko lehiaketan parte hartu, lesioak direla medio.

Jakina zen iragan astean ezker eskuan ebakuntza egin zioten Mikel Idoatek eta ezker oineko bosgarren metatarsianoan min hartu zuen Danel Elezkanok ezin izango zutela aurtengo lehiaketan parte hartu, baina bizkaitarraren antzeko arrazoiengatik, Pablo Berasaluzek ere uko egin behar izan dio, bigarren urtez jarraian, orain bi denboraldi horren emaitza onak eman zizkion txapelketari.

Iaz bezala -orduan Binakako finala jokatzen ari zela izandako lesio larria izan zen erruduna-, behar bezala sendatu gabeko lesio batek lehiaketatik at utziko du Berrizkoa. Gaur emango dioten erresonantzia magnetikoaren emaitza edozein delarik, aurrelariak esana dio enpresari ez dela aurtengoan jokatzeko moduan izango.

Hasiera batean uste baino azkarrago -hiru hilabete izan zitezkeenak hilabete eta erdi izan ziren- itzuli zen kantxetara irail erdialdean, baina hobera egin behar zuen oinak okerrera egin du eta sanmateotan aritu ostean, berriz ere geratu beharra nabaritu du, kantxetan gustura sentitu ez eta partidak oso juxtu amaitu ostean. «Bai, arinegi itzuli nintzen. Ilusio handia neukan Lau eta Erdikoa jokatzeko, partida batzuk jokatu nahi nituen, nola sentitzen nintzen probatu, baina gauzak ez dira ondo joan, minarekin jarraitzen dut eta ea denbora apur batekin ondo jartzen naizen», onartu zuen pilotariak Euskadi Irratiko «Katedra» saioan.

Lehiaketaren presio hori gabe -Bizkaiko Bost eta Erdikoan ere ez da arituko eta bere lekua Oinatz Bengoetxeak hartuko du- orain denbora gehixeago izango du oin hori osatzeko eta Binakako txapelketa ahalik eta hobekien prestatzea izango da bere hurrengo erronka.

Gazteei aukerarik ez

Hutsuneak hutsune, ez dirudi enpresetako ordezkariek gazteei aukera handirik emateko asmo handirik dutenik eta Promozio mailako txapelketa sekula baino erakargarriagoa suerta daiteke aurtengoa, Altuna III.a, Artola eta Victor bezalako pilotariak bigarren mailako txapelketan arituko baitira, azken uneko aldaketarik ezean.

Printzipioz, iazko lehiaketa sistema bera errepikatuko dute, final-laurdenetako ligaxka eta guzti. Hartara, enpresa bakoitzak zortzina lehiakide aurkeztuko ditu eta ez da aurpegi berri askorik espero. Iazko Promozio txapelketa irabazi ostean, Stephane Lemuno izango da berrikuntzarik handiena. Hasiera batean, Berasaluze II.a jokatzeko moduan egongo zela uste zenean, Asegarceko ordezkariek atariko kanporaketa bat jokatzeko asmoa zuten Agurainen, Lapurdin bizi den kolonbiarraren eta Mikel Beroizen artean, baina Berrizkoak jokatuko ez duenez ez dute halakorik egin beharrik izango eta Aimar Olaizolak, Ekaitz Saralegik -honek ere eskuetako arazoak izan ditu-, Oinatz Bengoetxeak -hiru hauek finalerdietan aritu ziren 2013an eta final-laurdenetan hasiko dute txapelketa-, Albisuk, Arretxe II.ak eta Urrutikoetxeak osatuko dute zortzikotea.

Asperen kasuan bai egongo dela atariko kanporaketarik, larunbatean Zaldibian Aritz Lasak eta Aitor Mendizabalek jokatuko dutena. Partida honetako irabazlearekin batera, Martinez de Irujo -zerrendaburua izango dena- Ezkurdia, Jaunarena, Xala, Retegi BI, Barriola eta Zabaleta izango dira Eibarko enpresaren ordezkariak. Etxarrengoa litzateke aukeraketa honetan atentziorik gehien sor lezakeena eta nabarmentzekoa da orotara lau izango direla aurrelarientzat egokiagoa dirudien lehia honetan izango diren atzelariak.