Ez zen ezusterik izan, eta Barberena anaiek lortu zuten, edo eutsi egin zioten, Euskal Herriko txapelari. Finala atzo jokatu zen Anitzen, eta jende ugari batu zen saioa zuzenean jarraitzera.

Bikote bakoitzak etzaniko 60 ontzakoari hamar epai eman behar izan zizkion, etzaniko kana-erdiko bati sei epai eman behar izan zizkion, eta beste sei, zutik jarritakoari. Esnaola eta Aizpurua oso indartsu abiatu ziren, baina zutik jarritako enborrean erori ziren. Ez ziren oso ongi moldatu, eta atzean geratu ziren.

Barberena anaiek eta Kañamaresek eta Eugik egin zuten aurrera, eta norgehiagoka polita izan zuten, nahiz eta apurka-apurka aldea ateratzen hasi ziren, eta txapela euren arteko lehia bihurtu zen.

Azkenean, ordea, txapeldunak euren gaitasuna agerian jartzen hasi ziren, baita zuloa handitzen ere, eta azkeneko epaietarako dena erabakita utzi zuten, txapela eskuetan baitzuten jada. Eugik eta Kañamaresek ere ez zuten izan bigarren postuari eusteko arazorik, ez eta Aizpuruak eta Esnaolak ere podiumean sartzeko. Emozioa hortik atzera egon zen, azkeneko hiru bikoteak oso alde txikian sartu baitziren. Pikabea anaiak izan ziren laugarren postu hori lortu zuten bi trontzalariak.