Kirmen Uribek, Mikel Urdangarinek, Rafa Ruedak eta Bingen Mendizabalek 2013. urte amaieran kaleratutako «Jainko Txiki eta Jostalari Hura» disko-liburuan oinarritutako dokumentala aurkeztuko da gaur Bilboko Campos Eliseos antzokian. Idazleak eta musikariek New Yorken egindako bira poetiko-musikalaren berri ematen du aipatu dokumentalak. Euskal Herriaren gaineko ikus-entzunezko disertazio bat da, «non herri hau txiki, anitz eta era berean unibertsal gisa aurkezten zaigun». Hitzordua arratsaldeko zortzietan. Antolatzaileek adierazi dutenez, sarrera doakoa izango da, aulki guztiak bete arte.