EAJren lehendakarigaia den Iñigo Urkullu Laudion izan da eta PP eta C's-ek inbestidurari begira erdietsi duten akordioaren inguruan hitz egin du. Hala, adierazi du aipatu alderdiek osatu dezaketen gobernua «arduratzeko modukoa» dela autogobernuari begira.
Gaineratu du bere alderdiak argi daukala Rajoyri «ezetz» esango diola eta, horren harira, esan du ez dutela inolako presiorik sentitzen aipatu erabakia aldatzeko. Izan ere, galdetu du ea zer motibo luketen Rajoyren inbestidura errazteko.
Zentzu horretan, gogoratu du Rajoyren Gobernuak mespretxatu egin dituela euskal herritarrak azken lau urteotan eta, orain, alderdi abertzaleei betoa jarri dien alderdi batekin batu dela.
Iragan ekainean ospatu ziren hauteskunde estatalei aipamen bat egin die Urkulluk, adieraziz PP bosgarren alderdi bozkatuena izan zela eta Ciudadanosek, bere aldetik ez zuela eserlekurik lortu.