Japoniako Gobernuak Fukushimako zentral nuklearrean pilatuta dagoen ur kutsatu eta tratatua itsasora isurtzeko plana berrikusi eta onartu du. Horren arabera, datorren udaberritik udara bitartean aurreikusten du ur horiek itsasora isurtzea. Egitasmoak kaltetua izan daitekeen arrantza industriarentzat kalte-ordainak ere jasotzen ditu, nahiz eta bertako arrantzaleak planaren aurka dauden. Hego Koreak eta Txinak ere protesta egin dute, besteak beste.

Energia Atomikoaren Nazioarteko Erakundea (IAEA) ura isurtzeko plana gainbegiratzen ari da, behin ura prozesatzen denean elementu erradioaktibo gehienak kentzeko, eta datorren astean misio bat bidaliko du Japoniara (mota horretako laugarrena), tokian bertan prestakuntza lanak aztertzeko.

«Isurketari ekin aurretik, itxarongo dugu IAEAk bere txosten orokorra egin arte, ikuskapenak indartu arte, kaltetutako eremuko produktuen salmenta babesteko neurriak hartu arte eta zurrumurru negatiboak zabaltzearen aurka lan egin arte», ziurtatu du Hirokazu Matsuno Gobernuaren bozeramaileak, plan berria onartu den bileraren ostean.

Bozeramailearen arabera, Ozeano Barera ura deskargatzea isurketarako lanak, Japoniako erregulatzaile nuklearraren ikerketa eta IAEAren txostena amaitzen direnean egingo da eta data zehatza aurtengo udaberriaren eta udaren artean izango da.

Hasiera batean zentrala ustiatzen duen Tokyo Electric Power (TEPCO) enpresak eta agintariek isuria apirilean egitea aurreikusi zuten, baina atzeratu egin behar izan dute urak itsasoratzeko erabiliko den urpeko tunelaren eraikuntza atzeratu egin delako.

Hondakin erradiaktiboekin kutsatutako ura

Isuriko den ura hondakin erradioaktiboekin kutsatutako ura da, erreaktoreak hozteko edo instalazio nuklearren barruan iragazteko erabili dena. 1,29 milioi metro kubiko daude gordeta bidoietan, lurrikarak eta 2011ko tsunamiak kaltetutako instalazio atomiko batzuen barruan, eta espaziorik gabe geratzen ari dira.

Zientzialariz osatutako talde batekin konponbide posibleak aztertu ondoren, besteak beste lurrunketa edo lurrazpiko injekzio metodoak, Japoniako agintariek eta TEPCOk metatutako likido guztia zentralaren parean itsasora isurtzea erabaki zuten, kutsadura kentzeko tratamendua egin ondoren.

Hala, ura prozesatze sistema baten bidez tratatzen da eta sistema horrek arriskutsutzat jotzen diren material erradioaktibo gehienak ezabatzen ditu, tritioa izan ezik. Naturan dagoen isotopoa da, kontzentrazio baxuan egon arren.

Arrantzaleak, aurka

Japoniako agintarien arabera, isuriak Osasunaren Mundu Erakundeak edateko urarentzat ezarritako mugaren azpitik dagoen erradioaktibitate maila izango du eta, beraz, ez du arriskurik izango ez gizakien osasunerako ez ingurumenerako.

Tokiko arrantza erakundeak isuriaren aurka daude; izan ere, 2011ko hondamendi nuklearraren ondoren ia ez dute berreskuratu haien jarduera eta isuriak bertako arrainari eta itsaskiari eragiten dien estigmak okerrera egingo duen beldur dira.

Gobernuaren egitasmoak 50.000 milioi yeneko (357 milioi euro) partida jasotzen du zentraletik gertu dauden arrantza industrientzat.

Fukushima Daiichiko zentraletik gertu dauden zonaldeetan 2011ko istripu nuklearraren ondorio latzak pairatzen ari dira oraindik, tartean oraindik ebakuatuta dauden milaka pertsona edo bertako arrantza, abeltzaintza eta nekazaritzaren gainbehera.