Gipuzkoako Foru Aldundiak errekurtsoa aurkeztu du EAEko Auzitegi Nagusiaren administrazioarekiko auzien salan, 6 eta 12 urte bitarteko adingabeek kirol klub batean izena eman ahal izateko Eskola Kirola programan parte hartzeko aldez aurreko baldintza partzialki baliogabetzen duen epaiaren aurka.

Idazkian adierazten denez, «aurkaratutako ebazpenak familia salatzailearen kasu zehatzak baino askoz eragin handiagoa du, eta inplikatutako milaka eskola-ume, kirol-klub, ikastetxe eta administrazio publikori eragiten die», foru erakundeak jakinarazi duenez.

2023-2024 ikasturteko datuen arabera, Eskola Kirolan izena eman duten 17.500 ikasleetatik 11.000 inguruk jasango dute epai horren eragina. Horretarako, orain arte egin den bezala, «Kirolaren Legeak agintzen duena betetzen jarraitzeko konpromisoa dago, hau da, Multikirola kirol anitzeko programa bat izatea, espezializazio eta ustiapen goiztiarra saihesteko».

Goizane Alvarez Kirol diputatuak adierazi duenez, «adingabeen heldutasun-garapena errespetatzea eta epe luzera jarduera fisikorako eta kirolerako ohitura-oinarri sendoak finkatzea, koordinazioa, gainkargagatiko lesioen prebentzioa eta interes eta trebetasun berrien aurkikuntza bultzatzeaz gain».

Ildo horretan, eredu hori «2023ko Kirolaren Euskal Legearen printzipioekin bat dator, eta kirol minoritarioak egitea sustatzen du, askotariko ekosistema bermatuz eta haur bakoitzaren aukerak zabalduz, bizitzarako gaitasunak jolasetik eta dibertsiotik irakasten dielako, eta ez emaitzatik, lehiaketatik edo talentutik».

Eskola Kirola hobetzeko konpromisoa

«Eredu solidarioa, integratzailea eta ikastetxeak erdigunean jartzen dituena, guztiontzako gune irisgarriak direlako, eta lehiarako presio eta estresik gabekoa», defendatu du.

Gipuzkoako Foru Aldundiak Eskola Jirola hobetzeko eta oinarrizko kirolaren esparruan «bakarra» den eredu horretan parte hartzen duten milaka ikasleei laguntzeko konpromisoa berretsi du. Gainera, espero du justiziak gaia argitu dezan, Gipuzkoako eskola-kirolaren programaren «egonkortasuna eta jarraitutasuna zuirtatzeko».