Aralarko San Migel santutegiak eraso bat jasan zuen 2024ko urriaren amaiera aldera. Ezezagunek bertako atea erre eta markatu zuten, eta berekin batera Euskal Herrian garrantzi espiritual, sinboliko eta historikoa duen kultura-ondasun bat hondatu zuten. Albistea jakiteaz batera, Albaola Kultur Faktoriak modu altruistan bere burua eskaini zuen atea artisau erara berreraikitzeko, eta San Migeleko komunitateak «poz handiz» jaso zuen albistea.

Horrela, bada, Albaola atearen berreraikuntzan murgilduko da. Zaharberritze lanak artisau erara egingo dira, Nafarroako Sakana eskualdeko egurra erabiliz, San Juan baleontzia egiteko erabilitako egur berberarekin hain zuzen ere. Behin amaituta, ate berria erromesaldi batean eramango da, idien tiradizoan, Albaolatik Santutegira. «Ibilbide honek sinbolikoki itsasoa eta mendia, oraina eta iragana, komunitatea eta ondarea lotuko ditu», nabarmendu dute Albaolatik.

Egitasmoa Mundu Berri Baterako Ateak proiektuaren baitan kokatzen da. Azaldu dutenez, jasandako erasoa esker on keinu bihurtu nahi dute, tolerantzia, errespetua eta auzolanaren espiritua bezalako funtsezkoak balioak aldarrikatuz. «Horrela, elkarlana eta kultura, mugak gainditzen dituen etorkizun partekatu baterako ateak balira zabaltzen dira», zehaztu dute.

Tradizioa, berrikuntza eta konpromisoa

Proiektua aurrera eramateko, erakunde sare bat eratu da, helburu komun batekin ahaleginak batu dituztenak: zauria eraikuntza aukera partekatu bihurtzea. Abentura honetarako lehen pausoa Albaolak eman zuen, eta orain, Albaola Itsas Kultur Faktorian, Pasaiako ontziola-museoan, eraikiko da atea, artisau moduan, teknika tradizionalak erabiliz eta publikoaren aurrean.

Virtualan enpresa ondare digitalean espezializatuta dago, eta dibulgazio materiala, material bisuala eta material interaktiboa garatuko du. Material hori publiko guztientzat eskuragarri egongo da, eta proiektua emozioetatik eta berrikuntza teknologikotik hurbilduko du.

Clau Creative Services ekoiztetxe nafarrak, berriz, prozesu osoa dokumentatuko du «begirada sentikor batez», kolektibo honen memoria jasota gera dadin eta partekatu ahal izateko.

Azkenik, Sare kolaboratibo honen parte da Getariako Elkano Arrantzaleen Kofradia ere.

Aralarko San Migel

Nafarroa iparraldeko Aralarko mendilerro ikusgarrian kokatuta, Aralarko San Migel Santutegia Iberiar Penintsulako tenplu zaharren eta esanguratsuenetako bat da. Bere jatorria VIII. mende inguruan kokatzen da, eta egungo eliza erromanikoa —XI. eta XII. mendeetan eraikia— espiritualtasun, arte eta historia ondare sakonaren gordailu da.

Santutegiak erlikia paregabeak gordetzen ditu, hala nola San Migel Kristoren gurutzea daramala irudikatzen duen eskultura eta erretaula ospetsua, Europan bakarra den harribitxia. Gaur egun ere, Aralarko San Migel espiritualtasunaren babesleku eta kultur argi bat da sinestun, bidaiari eta ondarearen zaleentzako.

Gogoratu behar da Aralarko San Migel Santutegia euskal kulturaren ikur esanguratsuenetako bat dela, historia eta tradizio luze batekin. Euskal identitatean sakon errotutako gune sakratua da.