«Gehiegi da! Guk ez ditugu gure haserrea eta aldarrikapenak konfinatuko», ohartarazi dute FNEC FP-FO 64, CGT Educ’Action 64 eta SNUipp-FSU 64 sindikatuek Baionako suprefeturaren egoitzaren aitzinean egin duten elkarretaratzean. Osasun krisia aitzin zituzten eskakizunak oroitarazi dituzte eta Gobernu frantsesak konfinamendua bere «helburuetan aitzinatzeko erabili» duela salatu dute.

Osasun krisia hasi zenetik hiru bider egokitu behar izan dituzte lan egiteko baldintzak hezkuntza arloan lan egiten duten eragileek. Maiatzaren 11 eta 18a bitartean ama eskola eta lehen hezkuntzako ikasleak hartzeko prestatu behar izan zituzten ikastetxeak. Ekainaren 2an, kolegioen txanda izan zen eta, neurri berriak iragarri zituen frantses Gobernuak. Azkenik, ekainaren 22an ikasle guztien derrigorrezko eskolatzea ezarri zen, eta ondorioz, berriz ere jardun bideak egokitzera behartuak izan ziren ikastetxe eta hezkuntza arloko langile guztiak.

«Neurri berriak ezarri dira, aurrekoak bezain onartezinak, buruko min bat gehiago hezkuntza arloko langileentzat eta beste desastre orokor bat», nabarmendu dute sindikatuetako ordezkariek. Baionan bildu diren manifestariek salatu dutenez, Gobernu frantsesak «neurri kontraesankorrekin anabasa sortzearekin nahikoa ez, eta krisi sanitarioa baliatu du bere egitasmoak aitzinatzeko».

Horrez gain, jasaten ari diren «presio hierarkiko onartezinak» salatu dituzte eta Blanquer ministroaren erreforma gaitzesteko ekintza sindikaletan parte hartu zuten kideen kontrako prozedurak bertan behera uztea eskatu dute, eta beste gauza batzuen artean, ezgaitasun egoeran diren ikasleei laguntzen dieten irakasleak onartuak izan daitezen «estatutu erreal bat» aldarrikatu dute. Irakaskuntza publikoan postuak ezabatzeari utzi eta beharrezko diren postuak betetzeko ere eskatu dute Hezkuntza arloko sindikalistek eta baxoa zein lizeoetako erreforma bertan behera uzteko aldarriak ere indarrean jarraitzen duela eman dute aditzera.