Bilboko Udaleko Osasun eta Kontsumo Sailak eta Bizkaiko Sendagileen Elkargoak kanpaina bat antolatu dute bilbotar guztiek bizitzaren amaieran beren zainketei buruz erabakitzeko duten eskubidea ezagutzen dutela bermatzeko.

Bizkaiko Sendagileen Elkargoaren aurretiazko borondateen bulegoa hiriko zortzi barrutietara hurbiltzea da xedea, jendearentzat errazagoa izan dadin autonomia pertsonalerako funtsezko baliabide hori erabiltzea, ekimenaren aurkezpenean azaldu dutenez.

Horrela, bulego ibiltariak aurretiazko borondateen dokumentua idazten, legeztatzen eta erregistratzen lagunduko die interesa duten herritarrei. Pazienteen historia klinikoari eransten zaion lege baliodun dokumentu horri esker, paziente bati arreta ematen dioten medikuek eta familiak erraz jakin ahal izango dute hark zer nahi duen bizitzaren amaieran, baldin eta ezin badu bere borondatea adierazi.

Zehazkiago, medikuek eta familiak jakin ahal izango dute pertsona horrek zer tratamendu onartzen dituen, zein baztertzen dituen eta nola iritsi nahi duen bizitzaren amaierara.

Horrela, kanpainaren baitan informazio saioak eta tailerrak antolatuko dira asteazken honetan hasi eta 2026ko otsailera arte Deustun, Otxarkoagan, Begoñan, Ibaiondon, Abandon, Zorrotzan, Basurtun eta Uribarrin. Data guztiak webgune honetan kontsulta daitezke.

Nolanahi ere, norbaitek aurretiazko borondateen dokumentua egin nahi badu eta udaltegietako datak ondo ez badatozkio, aurretiazko borondateen bulegora joateko aukera du, hitzordua eskatuta, Bizkaiko Sendagileen Elkargoan (Bilboko Lersundi kaleko 9 zenbakian).

Alvaro Perez Bilboko Udaleko Osasun eta Kontsumoko zinegotziak ekimenaren aurkezpenean azaldu duenez, kanpaina «beste urrats bat da zaintzen duen hiri baten alde, alegia, une gogorrenetan ere herritarren eskubideak babesten dituen hiri baten alde. Nahi dugu bilbotar guzti-guztiek jakitea beren nahiak idatziz adierazteko eskubidea dutela, eta eskubide hori baliatzeko aukera izatea».

Era berean, Bizkaiko Sendagileen Elkargoko presidente Joseba Atxutegi Amarikak nabarmendu du gaian adituak diren medikuak arduratuko direla udaltegietan jendeari aurretiazko borondateak idazten laguntzeaz.

«Helburua da hausnartutako dokumentu bat egin ahal izatea, kalitate handikoa, interpretaziorako aukerarik emango ez duena. Horrela, jasotako jarraibideak bete behar dituzten osasun langileek oso argi izango dute egileak zer erabaki duen», azaldu du.