Oihan Unai Ataun iruindarrak Huescako Pirinioetako Estribiella eta Siresa arroiletara egindako txangoan ateratako argazkia igorri digu. Irudia bera parajeok bezain ederra da. Askatasunaz ari gara, eta gauza gutxik isla dezakete askatasun nahia bere bidean libre dabilen ur-lasterrak baino. Gaindi ezinezko oztoporik gabe, urak beti aurkitzen du aurrera egiteko modua, batzuetan trabei izkin eginez, beste batzuetan gainetik pasaz. Eta ibiliaren ibiliaz mendiko errekastoek bidelagunak aurkitzen dituzte, erreka eta ibai bihurtu, itsasora heldu arte, askatasun mugagabera.