Datorren astean Iruñea jaietan izango da, eta egunero, uztailaren 8an hasi eta 14ra arte herri kirol jaialdiak izango dira, 12.00etan, Foruen plazan, eta tartean herrialdeko txapelketa ugari erabakiko dira. Abuztuan beste hainbeste gertatuko da Gasteizen Arabakoekin.

Atzo ezagutarazi zuten egitaraua, eta indartsu abiatuko da, 8an jokatuko baitira Nafarroako maila nagusiko mutilen eta nesken trontzako finalak.

Beste txapelketa esanguratsuei begiratuta, uztailaren 10ean bigarren mailako aizkolarien kanporaketa jokatuko da; 11n, harri-jasotze txapelketa; 12an, binakako aizkolarien finala; eta 13an, hirugarren mailako aizkolarien kanporaketa.