Aizkorako zaleek egun handia izango dute biharkoa. Izan ere, arratsaldean Euskal Herriko Bigarren Mailako kanporaketa jokatuko da Lakuntzan, eta, eguerdian, 12.30ean, Euskal Herriko Hirugarren Mailako kanporaketa izango da ikusgai Gorritiko pilotalekuan.

Eloy Kortxero, Iñaki Kintana, Beñat Lekue, Aritz Oregi, Julen Alberdi, Aitor Urteaga, Asier Pellejero, Iban Resano, Xabier Mindegia, Abel Uria eta Jon Telletxea izango dira lanean arituko diren aizkolariak. Bakoitzak lau kana-erdiko ebaki beharko ditu, eta aurreneko hirurak sailkatuko dira finalerako. Jadanik sailkatuta daude Arria V.a, Kañamares IV.a eta Eneko Saralegi, Leitzan abuztuaren 11n jokatu zen kanporaketan lortu baitzuten finalerako txartela.

Alberdi, Pellejero, Resano eta Mindegia agertzen dira finalean sartzeko faboritoen zerrendan, baina hori bihar eguerdian baieztatu beharko dute. Tartean aizkolari berriak ere agertu dira, eta hori oso pozgarria da etorkizunari begira. Aranberri eta Uria aurreneko aldiz arituko dira txapelketa honetan, eta euren lana oraindik ikusgai dago, inork gutxik ikusiko baitzituen plazan lanean.