Euskal Herriko Emakumeen Mundu Martxak elkarretaratzea egin zuen atzo, Bilbon Lakuak duen egoitzaren parean. Emakumeentzako pentsio duin eta propioak aldarrikatu zituzten, mezua instituzioei helaraziz eta, bide batez, iragarri zuten bat egingo dutela pentsiodunek larunbatean Bilbon (18.00etan) egingo duten manifestazioarekin.

«Aitortu gure lana, pentsio duin eta propioak emakumeontzat» lemarekin elkartu ziren Bilboko Kale Nagusian. Izan ere, Euskal Herriko erretiratuen mugimenduarekin bat egiten duela argi adierazi nahi izan zuen plataformak, «bidelagun ikusten ditugu, mobilizazioaren bidez aldaketak lortu ahal direla sinesten dugulako».

Emakumeen pentsioak duinak izan daitezen administrazioak neurriak hartu behar dituela azpimarratzen dute. Beren webgunean dei hau egin diete emakumeei: «Bizitza osoa lanean eman eta pentsiorik ez duten zein soldatapeko lanean arituta pentsio negargarri bat jasotzen duten emakumeen eskubideen defentsan, emakume guztiok atera behar dugu kalera».

«Ikusezinak eta bigarren mailakoak egiten gaituen sistema kapitalista eta heteropatriarkal honen aurka egin behar dugu», gaineratu zuten.