Haritz LARRAÑAGA
DONOSTIA
Surf

Belharran eta Peahin: Michel Larronde, surflari aitzindaria

Laird Hamilton surflari ezagunak Michel Larronde aipatzen du Peahin (Maui) surf egiten hasi ziren surflarien artean. Biarrizko surflaria Belharra olatu (Lapurdin) famatua hartzen ere aitzindaria izan zen. Tyler, bere semea, olatu handietako surflari ezaguna bilakatu da.

Larronde aita-semeak, beti izan dira olatu handien zaleak. Michelek itzalean egin du bere ibilbidea, baina Tyler, munduko olatu handietako surflari hoberenetako bat da gaur egun. Ordea, Tylerren lorpenak ezinezkoak lirateke Michel bezalako surflariek bidea ireki ez balute.

Uretako motor baten laguntzaz Hawaiiko Maui uhartean surf egiten hasi zirenean Michel Larronde bertan zegoen, eta Laird Hamiltonek Peahiko olatu beldurgarrietan surf egiten hasi zirenen artean oroitzen du. Surflari profesionalek izandako esperientzia beldurgarriak kontatzen dituen “Coup de Pression” liburuan, Peahin surf egiten hasi zirenean elkarrekin pasa zituzten larrialdi egoerak jasotzen ditu Hamiltonek.

Michel Larrondoren kontakizuna

Horrela kontatzen du Michel Larrondek Hamiltonek erreferentzia egiten dion Peahiko pasadizoa: «1994an izan zen, baina atzo bertan izan bazen bezala oroitzen dut. Vincent Lartizienekin batera nengoen; gure lehen saioa zen Peahin, eta, iritsi ginenean, Laird han zen eta jada zenbait olatu hartuak zituen. Elkar ezagutzen genuen, nire jatetxeko bezero onena baitzen».

Vincentek gidatzen zuen uretako motorrak bultzatuta dozena erdi bat olatu hartu ondoren, olatu batean huts egin zuen Larrondek eta itzuli zenean itzelezko olatua gainera zetorkiola ikusi zuen: «Garai hartan taula txikotaz lotuta izaten genuen. Vincent hurbildu zen, baina motorrera igo, taula berreskuratu eta txikota askatu beharra nuen; ez nuen astirik eta joaten utzi nion». Jarraian bizi izan zuen esperientzia azkena izan zitekeen, baina zorionez onik atera zen: «Olatuaren kontra arraun egin nuen eta, gainaldean gandorra altxatzen ari zela, azpiratzea eginez zeharkatu ahal izan nuen. Baina olatua pasa orduko berarekin eramango ninduela sentitu eta arnasa sakon hartu nuen. Sakon hondoratu ninduen, sekulako astindua emanez; txalekorik ez nuenez, gainazalera igotzea kostatu egin zitzaidan, eta, iritsi nintzenean, airea hartu orduko bigarren olatuak azpian hartu ninduen».

Taula galdu eta hirugarren olatu baten astindua jaso ostean, Marc Angulok atera zuen arriskutik, uretako motorraren laguntzaz. Hori bai, atzealdean zihoanez, motorrak jaurtitzen zuen ur txorrotak zuzenean aurpegian jotzen zion. «Xehatuta amaitu nuen, benetan sinetsi nuen guztia amaitu zela», gogoratu du Larrondek. Honakoa ere gaineratu du: «Sei urte geroago txalekoak atera ziren eta gauzak erabat aldatu ziren».

Larrondetarrak

Michel eta Tyler Larronde Hawaiiko Maui irlan bizi diren aita-semeak dira. Michel Ainhoan jaio zen eta 11 urte zituela Biarritzera joan zen bizitzera bere amonaren etxera. 70eko hamarkadaren hasieran oraindik ez zen jende asko ibiltzen Biarritzeko olatuetan, baina Michel Lapurdiko kostaldean dauden hondartza bikainetan surf egiten hasi zenean, gaur arte etenik izan ez duen harremana hasi zuen itsasoarekin.

Txapelketetan lehiatzen hasi zenean bidaiatzeko aukera izan zuen Frantziako surf talde nazionalarekin, eta orduan erabaki zuen munduko edozein lekutan lan egiteko aukera emango zion lanbide bat ikastea. Horrenbestez, sukaldaritza ikasi eta bidaiatzeari ekin zion. Munduan zehar bidaiatzen ibili ostean, 1985ean lan eskaintza bat izan zuen Hawaiiko Maui irlan eta ez zuen bitan pentsatu.

1995. urtean Vincent Lartizien wind-surflari profesionalarekin egin zuen topo eta lagun egin ziren. Peahin tow-in egiten hasi ziren urtea izan zen hura. Urte horretan bertan, Euskal Herrira etorri ziren olatu handiak hartzera. Itsasaldi handiak izan ziren eta leku anitzetan izan ziren tow-in egiten, baina aipagarriena Belharrako saioa izan zen, Urruñako olatua lehen aldiz hartu baitzuten.

Urte bat lehenago jaio zen Tyler Larronde, Hawaiiko Maui uhartean, baina beti izan du Biarritzekin lotura handia aitaren aldeko familia lapurtarra baitu. Biarrizko La Grand Plage Surf Club elkarteko kide da oso gazte zenetik.

Tyler 16 urte zituenean egin zen famatu, Peahiko olatua hartzen zuen surflaririk gazteena bihurtu baitzen. Mota guztietako olatuetan moldatzen den surflaria da, maila tekniko bikainekoa, baina batez ere olatu handietan ezaguna.

Peahiko olatua oso ongi ezagutzen du eta horri esker hainbat izendapen eskuratu ditu XXL Awards izendapenetan. 2010eko azaroaren 2an sekulako itsasaldia izan zen Hawaiin eta 2011ko XXL izendapenetan bere izena eranstea lortu zuen lehen aldiz irudi bikain bati esker. Ordutik, olatu handietako bere irudiak aldizkarietan argitaratu dira sarri, eta XXL izendapen gehiago ere eskuratu izan ditu. Aurtengo sariketan, Peahin izan zuen erorketa bateko irudiek lortu dute izendapena.

Honi buruzko guztia: Surf