Xabier Leteren (Oiartzun, 1944- Donostia, 2010) heriotzaren hamargarren urteurrena betetzear dagoenean, Gipuzkoako Aldundiaren Kultura sailak omenaldia antolatu dio musikari eta sortzaileari; bihar, Donostiako Victoria Eugenia Antzokian. Joan ahal izateko gonbidapena beharrezkoa da eta gaur, 11.30etik aurrera, banatuko dira antzokiko leihatilan. Ordu berean aktibatuko da eskabidea egiteko lotura www.donostiakultura.eus atarian “Erreserbak” izeneko loturan.

Emanaldiaren zuzendaritza Fernando Bernues zuzendari artistikoaren ardura izan da eta Frantxis Lopez Landatxerena du gidoia. Saioa 19.00etan hasiko da eta streaming bidez ikusi ahal izateaz gainera, ETBn bi saio eskainiko zaizkio.

«Ukaezina da haren oihartzuna ikaragarri zabaltzen ari dela hainbat esparrutan. Izan ere, bere poetikari buruzko hainbat tesi aurkeztu eta argitaratu dira azken boladan; poeta gazteek Xabierren lana goraipatzen dute eta irakurketa berriak proposatzen dituzte. Urteetan zehar euskal aldizkari eta egunkarietan argitaratu den antologia bikaina argitaratu berri da, eta laster prestatuko da Leteren musika berrargitaratzeko», adierazi zuen Aldundiak atzo, aurkezpenean.

Harkaitz Millan Kultura diputatuak Xabier Leteren irudia nabarmendu zuen: «Elkarrizketa etikoaren eta estetikaren arteko erreferentzia da, euskarazko kulturaren alde duen konpromisoagatik eta diktaduraren gau luzearen ondoren suspertzeagatik. Baita indarkeriaren aurkako konpromisoagatik ere. 1980an ETAren aurka sinatu zen 33en ‘Garaiz gabiltz’ manifestuaren sinatzaileetako bat izan zen. Gainera, erantzukizun instituzionalak izan zituen Gipuzkoako Foru Aldundian bertan, eta Kultura diputatu izan zen 1985ean», gogoratu zuen.

Izen asko batu dira

Victoria Eugenian izango dira hainbeste urtez Leterekin aritu ziren Anjel Lertxundi, Bernardo Atxaga eta Mariasun Landa idazleak eta Antton Valverde musikaria. Halaber, oiartzuarrarekin aritutako musikariek ere parte hartuko dute eta Karlos Gimenez omenaldiaren musika zuzendariak beste lau pianistarekin parte hartuko du (Iñaki Salvador, Sorkunde Idigoras, Fredi Pelaez eta Joana Ortega). Txema Garcesek, Pascal Gaignek, Pello Ramirezek eta Jabier Muguruzak Leteren musikari taldea gogoratuko dute.

Kantariak Leteren musikan murgilduko dira zenbait bertsioren bidez, eta abesti batzuk oroituko dituzte, eta sortzaileak utzi dizkigun lanak errezitatzera igoko da Felix Zubia, Leteren mediku, lagun eta bertsolaria, Joxan Goikoetxea soinu-jotzailearekin batera.

Karlos Linazasoro, Asier Serrano, Juanjo Olasagarre, Itxaro Borda, Jon Gerediaga, Luis Garde, Jon eta Alaia Martin bertsolariak, Ane Gabarain, Petti, Eñaut Elorrieta, Olatz Salvador eta Maria Berasartek ere parte hartuko dute, besteak beste.